Tuesday 19 June 2007

తప్పులెన్నువారు(1) - 1983

"గఛ్ఛతస్సఖలనం న దోషాయ" - నడిచేవాని కాలు జారితే అందులో తప్పేం లేదు. కదలకుండా మెదలకుండా కూర్చున్నవాని కాలు జారే ప్రసక్తే లేదు. పని చేసేవాడే తప్పులూ చేస్తాడు. పనీపాటా లేనివానికి ఆ అవసరం ఉండదు. కనుకనే ఏదో తప్పు చేస్తామేమో అని ఏ పనీ చేయకుండా చేతులు కట్టుకొని కూర్చోవడం సరికాదు. ముందు పనికి సిద్ధపడాలి. తర్వాత మిగతావన్నీ చూసుకోవచ్చు. చాలామంది తామేమీ చేయకుండా ఏదో చేసేవారిని తప్పులు పడుతూ కూచుంటారు. తప్పులు పట్టడం సులభం. ఏవో వంకలు వెతకడం సులభం. అసలది కార్యవాది లక్షణం కాదు. కానేకాదు. క్రియాపరత లేనప్పుడే ఈ రంధ్రాన్వేషణపరత్వం అలవడుతుంది. ఎవరేం చేసినా ఏదో తప్పులు నెమకుతూ వారిని కూడా నిరుత్సాహపరచి, తామూ చేయక, ఇంకొకరినీ చేయనీయక ఇలాంటివారు కాలక్షేపం చేస్తూంటారు.

#నెమకుతూ = వెదకుతూ

No comments: